Banks.am

Կոնվերս Բանկն այսօր սկսել է իր թողարկած կորպորատիվ պարտատոմսերի առաջին տրանշի տեղաբաշխումը:

Ինչպես հայտնել են բանկում, տեղաբաշխմանը կհետեւի պարտատոմսերի ցուցակումը "ՆԱՍԴԱՔ ՕԷՄԷՔՍ Արմենիա"-ի կորպորատիվ պարտատոմսերի հարթակում՝ երկրորդային շուկայում շրջանառվելու համար:

Թողարկման ընդհանուր ծավալը կազմելու է 1 մլրդ դրամ եւ $10 մլն: Պարտատոմսերի առաջին տրանշի տեղաբաշխման ծավալը $6 մլն է, մեկ պարտատոմսի անվանական արժեքը` $100, շրջանառության ժամկետը՝ 24 ամիս՝ արժեկտրոնների վճարման կիսամյակային պարբերականությամբ եւ պարտատոմսերի տարեկան 5,75% արժեկտրոնային եկամտաբերությամբ:

"Այս թողարկմամբ Կոնվերս Բանկը կդիվերսիֆիկացնի իր պարտավորությունների պորտֆելը՝ ներգրավված միջոցներն ուղղելով տնտեսության տարբեր ոլորտներում ներդրումային ծրագրերի ֆինանսավորմանը",- նշել է բանկի գործադիր տնօրեն Արթուր Հակոբյանը:

"Պարտատոմսերն աշխարհում տարածված ներդրումային գործիքներից են, որոնք ավանդների համեմատ մի էական առավելություն ունեն: Դրանք ցանկացած պահի կարելի է վաճառել մասամբ կամ ամբողջությամբ՝ պահպանելով կուտակված տոկոսագումարները",- ասել է բանկի ֆինանսական տնօրեն Հրանտ Հակոբյանը:

Պարտատոմսերը երաշխավորված են Ավանդների հատուցումը երաշխավորող հիմնադրամի կողմից՝ ավանդների երաշխավորման ծավալներով:

Թողարկված պարտատոմսերի ռեեստրը վարելու է "Կապիտալ ինվեսթմենթս" ընկերությունը, որն իրականացնելու է նաեւ շուկա ստեղծողի գործառույթները: