Կայացել է Հայաստանում Արգենտինայի առեւտրային պալատի պաշտոնական բացման արարողությունը, որին մասնակցել եւ Կոնվերս բանկի փորձն է ներկայացրել Բանկի Գլխավոր գործադիր տնօրեն Արթուր Հակոբյանը: ՀՀ-ում Արգենտինայի դեսպանատան նախաձեռնությամբ կազմակերպված միջոցառմանը ներկա էին հյուրեր Արգենտինայից, Կոնվերս բանկի ղեկավարությունը, ՀՀ գործարար համայնքի եւ պետական կառույցների ներկայացուցիչներ:
“Կոնվերս Բանկը արգենտինական կապիտալով առաջին ընկերություններից է Հայաստանում, որի հիմնական բաժնետերը պարոն Էդուարդո Էռնեկյանն է: Ներկայում Հայաստանում Էռնեկյան ընտանիքի կողմից են կառավարվում նաեւ Տիեռաս դե Արմենիան, Կարաս վայնսը, Արմենիա միջազգային օդանավակայանները: Դրանց հիմնադրումը ոչ միայն խթան է հանդիսացել տնտեսության տարբեր”,- իր խոսքում նշել է Կոնվերս Բանկի Գլխավոր գործադիր տնօրեն Արթուր Հակոբյանը:
Նա Կոնվերս Բանկի անունից պատրաստակամություն է հայտնել համապարփակ աջակցություն ցուցաբերել Պալատի աշխատանքներին, նշելով, որ “Հայաստանում Արգենտինայի առեւտրային պալատը ստանձնում է բավականին հետաքրքիր հանձնառություն՝ կապ ստեղծել միմյանցից հազարավոր կիլոմետրեր հեռավորությամբ գտնվող երկրների ու գործարարների միջեւ:
Հայաստանի տնտեսության զարգացման ներկա փուլում տարբեր երկրների հետ տնտեսական կապերի զարգացումը, ներդրումների խթանումը կարևորագույն հրամայական է եւ նորաստեղծ պալատը իր ուրույն դերը կարող է ունենալ երկկողմ տնտեսական նախաձեռնությունների իրագործման հարցում: Մենք առավել քան վստահ ենք, որ հայ-արգենտինական տնտեսական կապերը զարգացման մեծ հեռանկար ունեն՝ ինչպես արդյունաբերության, այնպես էլ առեւտրի, ՏՏ, զբոսաշրջության, գյուղատնտեսության, մարդկային կապիտալի կառավարման ոլորտներում”:
Հայաստանում Արգենտինայի արտակարգ եւ լիազոր դեսպան Մարիանո Վերգարան իր հերթին նշել է, որ Կոնվերս բանկը Հայաստանում Արգենտինայի դեսպանատան հետ համագործակցության մեծ փորձ ունի տարբեր ոլորտներում: Բանկի աջակցությամբ են իրականացվել այնպիսի նախաձեռնություններ, ինչպիսիք են Արգենտինական տանգոյի օրերը Հայաստանում, Բրյուսովի անվան համալսարանում Արգենտինական կենտրոնի բացումը եւ այլն: “Կոնվերս Բանկը հաջողված ներդրման հիանալի օրինակ է, կայացած բիզնես, որը կամուրջի դեր է ստանձնել երկու քաղաքակրթությունների միջեւ նաեւ մշակույթի, կրթության, առողջապահության ոլորտներում: Հուսով եմ, Պալատի գործունեության շնորհիվ շատ շուտով նման կամուրջները կավենանան”,-ասել է նա: